“Ang
Diyos ang nagtatag ng Kanyang simbahan, at Kanya itong pinalalago sa
pamamagitan ng Kanyang mga anak.” Iyan
ang mariing ipinahayag ni Pastor Ed Laurena habang kanyang ipinaliliwanag ang pinagpalang
kasaysayan ng Christian Bible Baptist Church (CBBC) sa San Pedro, Laguna. Tinukoy
din niyang ang Panginoong HesuKristo ang Founder at Foundation ng kauna-unahang
Baptist church na nagsimula sa Jerusalem.
Ito ay ayon sa Matthew 16:18, “…
Upon this rock I will build my church; and the gates of hell shall not
prevail against it.” Salamat sa Diyos
dahil ang naturang Baptist Church na itinayo at pinagtibay ng Panginoong Hesus
ang pinanggalingan ng CBBC.
Sa kapangyarihan
ng Diyos na magsugo ng Kanyang mangangaral sa kalooban Niyang lugar sa tamang
panahon, nahamon, nahimok at nahikayat si Pastor Laurena noong 1977 na sumunod
sa panawagan ng Panginoon. Kasama ang
kanyang maybahay na si Ma’am Dhel at ang kanilang sanggol na si Mishael, siya ay
nagtungo sa San Pedro, Laguna mula sa Camalig, Albay noong January 5, 1978. Nagkaroon ng pinakaunang Linggong
pananambahan ang Christian Baptist Mission noong ika-22 ng Enero, 1978 at 42
ang dumalo sa Mission House na isang inupahang apartment. Pagkalipas ng isang taon, sa biyaya ng Diyos,
ang Christian Baptist Mission na may attendance na 146 ay na-organize bilang
Christian Baptist Church (CBC). Sa
tagumpay na iginawad ng Diyos noong 1980 ay nagdiwang ang Simbahan ng kanyang
unang anibersaryo. Sa taon ding yaon
nagsimulang magsuporta ang Simbahan ng mga mission, at naglunsad ng pagbibigay
ng first fruits.
Ang lumalagong
Simbahan ay dumanas ng matinding pagsubok noong 1981 kaya bumaba ang bilang ng
mga dumadalo sa 40. Gayunpaman, ang habag
at lakas ng Diyos ang nagtaguyod sa Kanyang Simbahan kaya ang mga miyembrong
matatapat at masisipag ay nagsipagbunga na nagdulot ng mahigit na 150 na attendance. Dahil sa dumadaming nagtitipon, ang Simbahan ay
kinailangang lumipat sa may San Pedro Ice Plant sa National Highway. Samantala,
isang mahalagang nangyari sa taong ito ay ang pagsimula ng unang mission sa Los
Baños, Laguna. Noong 1982 naman ay
sinimulan ang mini-Bible Institute upang maituro nang lubusan ang Salita ng
Diyos at mga doktrina sa mga manggagawa ng Simbahan.
Sa taong 1983,
nakabili ang Simbahan ng 500 sqm na lupa sa St. Francis Homes 2. Sa tulong ng Diyos at sa sacrificial giving
ng mga miyembro, nasimulan ang pagtatayo ng bahay-sambahan. Ang 1984 at 1985 ay
panahon ng building construction. Sa
kakayahang ipinagkatiwala ng Diyos sa Kanyang mga anak na manampalataya sa
Kanya, natapos ang kauna-unahang church building ng Simbahan noong 1985. Ito ang tinatawag natin ngayong “Old
Building.” Sa taong 1984 na-organize na simbahan ang mission sa Los Baños, kaya
ito ang unang “daughter church” ng CBBC.
Noong 1985 din ay naging “Christian Bible Baptist Church” ang “official
name” ng Simbahan buhat sa dati nitong pangalang, Christian Baptist
Church. Samantala, ang Christian Bible
Baptist Academy o CBBA na gumagamit ng Accelerated Christian Education (ACE)
curriculum ay nagbukas at 30 mag-aaral ang nag-umpisang pumasok.
Noong 1986 ay
nagkaron ng building extension para sa CBBA.
Kasabay nito ay ang pagsimula ng Christian Bible Baptist Seminary na may
9 na Bible students. Ang pangalawang
mission work ay sinimulan sa Lipa, Batangas, at nagkaroon din ng overseas
outreach sa Saudi Arabia. Sa 1987
hanggang 1988 ay naabot hanggang nalampasan ng CBBC ang 450 na attendance. Nakabili rin ng lupa at nagkaroon ng
panibagong building construction ang Simbahan.
Sa taong 1988 ay na-organize na mga simbahan ang apat na mission works na
pinangungunahan ng mga sinugong lingkod ng Diyos: Fort Bonifacio, Taguig, Metro
Manila - Pastor Gil Laurena; Lipa, Batangas – Pastor Rusty Ocampo; Cabuyao,
Laguna - Pastor Ramon Revilla; at Calamba, Laguna - Pastor Jecel Saguindan. Tunay ngang ang Simbahang itinatag ng Diyos
ay magpapatuloy dahil sa Kanyang kakayahan at para sa Kanyang kaluwalhatian!!!
No comments:
Post a Comment